Қазақстандық актриса Самал Еслямова Гонконгта өткен Азия киноакадемиясында (Asian Film Awards Academy) «Азияның үздік актрисасы» сыйлығына ие болды. Бұл туралы ҚР Мәдениет және спорт министрлігі хабарлады.

«Жаңа ғана режиссер Сергей Дворцевойдан керемет жаңалықты естідім. Гонконгта өткен Азия киноакадемиясында (Asian Film Awards Academy) Самал Еслямова «Азияның үздік актрисасы» сыйлығына ие болды», — деп хабарлады министр Арыстанбек Мұхамедиұлы. Оның айтуынша, Asian Film Awards Academy — «Азиялық Оскар» саналады. Азия киноакадмиясы номинанттардың тізімін 11 қаңтарда белгілеген. «Бұл өте ірі жетістік. Шығармашылық команданы шын жүректен құттықтаймын!», — дейді министр.

Еске сала кетсек, Самал Еслямова былтыр 71 Канн кинофестивалінде өз аталымы бойынша үздік деп танылған болатын. Актриса ресейлік режиссер Сергей Дворцевойдың «Айка» атты картинасында басты рөлді сомдаған.

Лязиза ТАБАР,
Өз тілшіміз.