ЕҢБЕКТЕН БАҒЫ ЖАНҒАН ҚАЖЕН ЕДІ

Кең байтақ еліміздің әр аймағында өзінің сара жолымен елге, халыққа сіңірген адал еңбегімен өскелең ұрпаққа үлгі болатын тау тұлғалы азаматтарымыз баршылық. Ал, осындай елі үшін жаратылған іскер жандарды Елбасы Н.Ә.Назарбаев: «Туған жердің әрбір сайы мен қырқасы, тауы мен өзені тарихтан сыр шертеді. Әрбір жер атауының төркіні туралы талай – талай аңыздар мен әңгімелер бар. Әрбір өлкенің халқына суықта пана, ыстықта сая болған, есімдері ел есінде сақталған біртуар перзенттері бар. Осының бәрін жас ұрпақ біліп өсуге тиіс» – деген болатын.

Балалық шағың – патшаның тағы

Балалық шақ – адам өміріндегі ең ғажап уақыт. Ол кімді де болмасын сағынтпай, аңсатпай қоймайды. Балалық тәтті қылықтарың, айналаңның елжіреп, мейірім төгуі, бәрі де санаңда берік орнап, жаныңа жылу ұялатады. Көбіміз осы уақытты бағалай білмейміз, есеюге асығамыз. Үлкен кісілердің түсіне көбіне балалық шақтары кіретінін білесің бе? Балалық шақ қайта оралмайды.